Datganiad tryloywder

Rydym eisiau bod mor agored â phosibl am waith ein Bwrdd gan sicrhau bod cyn lleied â phosibl o drafodaethau a phapurau sy’n gyfrinachol.

Byddwn yn cyhoeddi agendâu, papurau a chofnodion drafft llawn o’n cyfarfodydd cyn gynted a phosibl ar ôl y cyfarfod, gan anelu at wneud hynny o fewn pythefnos ar ôl y cyfarfod.

Mae papurau’r Bwrdd yn cynnwys gwybodaeth allweddol am faterion pwysig y bydd yn rhaid i’r Bwrdd eu hystyried wrth wneud ei benderfyniadau fel Cydraddoldeb, Amrywiaeth a Chynhwysiant, barn ein rhanddeiliaid a chysylltiad y materion â’n Strategaeth Gorfforaethol.

Byddwn hefyd yn cyhoeddi ein hadroddiadau perfformiad allweddol, gan ddefnyddio dull cerdyn sgorio cytbwys gydag adroddiadau naratif ac eithrio cysylltiedig. Mae hyn yn ychwanegol at adroddiadau blynyddol i’r Bwrdd ar feysydd allweddol o’n gwaith, adroddiadau ariannol a diweddariadau rheolaidd i’r Bwrdd ar ein cynllun busnes.

Rydym yn cyhoeddi ein papurau ar dudalennau gwe’r Bwrdd (dolen i ddilyn). Mae’r adran hon o’n gwefan yn cynnwys deunydd hygyrch ar waith y Bwrdd, gan gynnwys cynnwys fideo, blog a phodlediadau.

Mae tudalennau gwe’r Bwrdd yn cynnwys fframwaith gwneud penderfyniadau. Mae’r fframwaith yn disgrifio’r hyn mae’r Bwrdd yn ei ystyried pan fydd yn gwneud ei benderfyniadau.

Rydyn hefyd yn cyhoeddi Datganiad Atebolrwydd clir. Mae’r Datganiad yn egluro o ble daw ein pwerau, i bwy rydym yn atebol, gan gynnwys y cyhoedd a’r proffesiwn a’n hadroddiadau goruchwylio ffurfiol, a sut yr ydym yn cyflawni’r gofynion hynny. Mae’r Datganiad yn cysylltu ag ystod eang o’n dogfennaeth gorfforaethol fel bod pawb yn gallu dod o hyd i bopeth mewn un lle.

Yr hyn y gallwn ac na allwn ei gyhoeddi

Mae’n bosibl na fydd yn briodol i gyhoeddi rhai o Bapurau’r Bwrdd am eu bod:

1. yn ymdrin â strategaeth neu bolisi arfaethedig
2. yn sensitif yn fasnachol
3. yn cynnwys data personol neu faterion yn ymwneud ag unigolyn a enwir, unigolyn y gellid ei adnabod neu sydd â disgwyliad rhesymol y byddai’r mater yn cael ei gadw’n gyfrinachol
4. yn cynnwys trafodaeth ar risg a allai gael ei dwysau drwy gyhoeddi
5. yn cynnwys cyngor cyfreithiol neu broffesiynol ar faterion sensitif neu gyfrinachol.

Os bydd eitem gwbl gyfrinachol yn ymddangos ar agenda gall gael ei rhestru fel ‘eitem gyfrinachol’ yn unig, heb ddim rhagor o wybodaeth.

O bryd i’w gilydd gall gwybodaeth gyfrinachol gael ei golygu neu ei hepgor o’r cofnod neu bapur a gyhoeddir, er y byddwn yn ymdrechu i wneud cyn lleied â phosibl o hyn. Mewn rhai achosion, gall papur y Bwrdd gynnwys gwybodaeth gyfrinachol mewn atodiad – er enghraifft manylion sy’n sensitif yn fasnachol – ac ni fydd yr atodiad hwnnw’n cael ei gyhoeddi.

Yn ychwanegol at ein cyfarfodydd Bwrdd ffurfiol, gall y Bwrdd gwrdd mewn sesiynau seminar neu weithdai, neu gynnal derbyniad neu ginio ar gyfer rhanddeiliaid. Ni chedwir cofnodion o’r sesiynau hyn ond gall y drafodaeth gael ei chynnwys mewn cofnod o gyfarfod ffurfiol o’r Bwrdd drwy adroddiad y Cadeirydd a chael sylw mewn cyhoeddiad cysylltiedig, fel blog y Cadeirydd ar ddiwrnod y cyfarfod.