Yr hyn y gallwch ei ddisgwyl gennym

30 Gorffennaf 2019

Yma rydym yn nodi sut y byddwn yn cydweithio â chi ac yn gwrando ar eich barn neu’ch pryderon. Rydym yn esbonio’r hyn y gallwch ei ddisgwyl gennym, p’un a ydych mewn cysylltiad â ni’n uniongyrchol ynteu’n cael eich cynrychioli gan sefydliad cymorth i ddefnyddwyr neu sefydliad eiriolaeth. Ein henw ni ar hyn yw ein "Siarter Ymgysylltu Cyhoeddus".

Anelwn at drin pawb yn deg a chyfartal, gan sicrhau ein bod yn deall eich anghenion.

Pwy ydyn ni a beth yw’n gwaith

Ni yw’r rheoleiddiwr i gyfreithwyr a’r mwyafrif o ffyrmiau cyfraith Cymru a Lloegr. Rydym yn gweithio er budd y cyhoedd, gan oruchwylio cyfreithwyr a ffyrmiau cyfraith. Mae hynny’n golygu ein bod ni:

• yn gweithio i sicrhau bod cyfreithwyr yn dilyn ein rheolau ac yn cyrraedd ein safonau uchel
• yn amddiffyn pobl pan fyddan nhw’n defnyddio cyfreithiwr neu ffyrm gyfraith:
  1. camu i mewn pan aiff rhywbeth o’i le gyda chyfreithiwr neu ffyrm gyfraith
  2. rhoi iawndal i bobl sydd wedi colli arian o dan amgylchiadau penodol
• yn gweithio i sicrhau bod gwasanaethau cyfreithiol yn hwylus a fforddiadwy.

Gallwch chi

• wirio a yw cyfreithiwr neu ffyrm gyfraith yn cael eu rheoleiddio gennym, i’ch helpu i wneud y dewis cywir wrth ddefnyddio gwasanaethau cyfreithiol
• rhoi gwybod inni am fater neu bryder ynglŷn ag ymddygiad cyfreithiwr neu ffyrm
• gwneud cais i’n Cronfa Iawndal os cawsoch golled ariannol o ganlyniad i anonestrwydd cyfreithiwr
• dod o hyd i wybodaeth am dwyll lle mae pobl yn cymryd arnyn nhw eu bod yn gyfreithwyr
• rhoi’ch barn inni am unrhyw newid rydyn ni’n ystyried ei wneud.

Byddwn yn agored ac atebol ynghylch

• yr hyn y gallwn ei wneud ichi
• yr hyn y gallwch ei ddisgwyl gennym
• sut y gwnaethom ein penderfyniadau ar ddisgyblaeth a pholisi
• beth i’w wneud os na fyddwch yn fodlon ar unrhyw elfen o sut rydyn ni wedi ymdrin â chi neu unrhyw benderfyniad a wnaethom.

Byddwn mor gynhwysol â phosibl

• drwy ddarparu gwybodaeth hwylus mewn iaith glir
• drwy gynnig amryw o ffyrdd gwahanol ichi gysylltu â ni
• drwy gydweithio â chi, lle bynnag y bo modd, yn y ffordd sy’n fwyaf addas i chi.

Ein nodau ni yw

1. Rhoi gwasanaeth cwsmeriaid o safon ichi pryd bynnag y byddwch yn cysylltu â ni. Fe fyddwn:

• yn gwrando arnoch
• yn broffesiynol a chwrtais
• yn dod yn ôl atoch pryd y dywedwn ni
• yn gweithredu’n deg, gan drin pawb yn gyfartal, heb wahaniaethu anghyfreithlon
• yn ymateb i’ch anghenion unigol, a sicrhau bod ein gwasanaethau’n hwylus
• yn gofalu am eich data fel y disgwyliech, a chadw’ch gwybodaeth yn gyfrinachol.

2. Wrth ymgynghori â chi ynghylch newidiadau a allai effeithio arnoch, fe fyddwn:

• yn nodi’n glir y rhesymau am unrhyw newid arfaethedig, sut gallen nhw effeithio ar bobl, a’r rhesymau pam rydyn ni’n gofyn eich barn chi
• yn rhoi digon o amser i bobl ymateb neu leisio barn
• yn sicrhau bod yr ystod ehangaf posibl o leisiau a sylwadau’n cael eu clywed, gan gynnwys y rhai a allai fod yn absennol fel arall, megis y rhai sy’n eu cael eu hunain mewn sefyllfa fregus
• yn defnyddio amryw o ffyrdd gwahanol i glywed y sylwadau hyn, yn uniongyrchol gan unigolion a thrwy sefydliadau cymorth i ddefnyddwyr a sefydliadau eiriolaeth
• yn gwrando, yn ystyried yr hyn y mae pobl yn ei ddweud, ac yn newid ein ffyrdd o weithio os dyna’r peth cywir i’w wneud
• yn gadael i bobl wybod sut mae eu barn wedi newid ein syniadau ni
• yn gwerthuso beth sy’n gweithio neu beidio, gan sicrhau ein bod yn gweithredu ar y gwersi.

3. Sicrhau bod pawb yn yr SRA, a’r rhai rydyn ni’n gweithio gyda nhw, yn cydnabod ac yn hybu pwysigrwydd gweithio fel hyn.

Gwybodaeth ddefnyddiol